rejection

akala niya ba, ginagawa mo ito nang magkaroon naman ng silbi ang pamamalagi mo sa daigdig niya? hindi siya ang sentro ng iyong pagsisilbi sa iyong sarili at hindi siya kailan man naging bahagi ng daigdig na binubuo mo na para lamang sa iyong sarili. akala niya siguro, kahit pareho kayo ng ginagawa, pareho na rin kayo ng intensiyon sa sarili.

ang kaso, magkaiba kayong lubos ng ginagawa. ni ang pagkahawig ay agad na dapat na itinitiwalag sa kaniyang isipan. magkaiba kayo ng mga balak. magkaiba kayo ng mga motibo. ibang-iba ang mga gusto niyang linangin, at hindi mo rin naman sinusubok na kilalanin ang kaniyang mga sinusubukang kausapin. lampas na siya, sa lahat ng pakiramdam niyang pagsubok, at ikaw nama'y pinipiling manatili lamang sa madilim na kuwebang ang tanging umaalingawngaw ay ang iyong boses.

dalawa ang lagusan at walang kailangang humila sa iyo. bakit sumusubok siyang tumulong sa hindi naman humihingi ng saklolo? dahil sa mga agnas niya nang mga papuri? mga pagsasawang galit? mga hindi niya kagaya kaya awtomatiko nang mali? ituro niya man at payakan ang wika nang harapan, walang gugustuhing maging siya kahit na kailan.