minabuti mong huminto na munang saglit sa ilalim at tabi ng isang poste ng ilaw. umupo ka na katabi ng iyong kasamang walang imik sa iyo nang kaniya mo siyang napili at damayan. tiningala mo ang tayog ng posteng pinili mo at nangyaring inasahang hindi mo rin masiguro ang itsura ng bumbilya at esksaktong pagyuko nito, o kung nakayuko nga ba ito.
alam mo lamang na napakataas nito. kinapa mo ang sahig na iyong kinauupuan at himalang walang alikabok na dumikit sa iyong palad. madali mong sinilip ang ilalim ng iyong panyapak at wala rin itong kahit anong bakas ng dumi. sa haba at tagal ng iyong nilakad! hindi ka gaanong makapaniwala. sumandal ka sa poste at hinimas ang paanan nito. yari sa bakal ngunit malayong-malayo pa sa kalawang. tinitigan mong muli nang deretso ang ilaw nito sa itaas.