Sa pinipili lamang na mahugot maya't maya ng aking alaala, mayroon akong dalawang subject noong ikalawang taon na umabot na sa pagkahikahos at nasa bingit ng alanganin. Mabuti na lamang at kaysa sipain ako ng paaralan, minabuti ng mga gurong pagawin na lamang ako ng special projects o assignments bilang mga pansalba sa nagmamakaawa ko nang mga grade.
Mabuti na lamang din at hindi lang ako ang nag-iisang nagbatugan sa mga subject na iyon at napahintulutan pa ako ng kapalaran na magkaroon ng karamay na sadyang madaling makapagpagaan ng pakiramdam lalo na't tila kay daling pumasan ng problema sakaling mayroon kang makakasabay na tahakin ito.
Hindi ko na yata binanggit ito sa aking mga magulang para hindi na sila mag-alala. Siyempre, ayaw ko lang din talagang mapagalitan. Alam ko naman din na mayroon akong pagkakamali. Tinamad lang din siguro ako, pero hindi naman sa lahat ng subjects. Nagkulang ba ako sa notes? Nakatulog ba ako habang nagtuturo sa ilang mga lektura? Kinulang lang ba sa saliksik iyong mga reporter sa mga manila paper at cartolina nila? Maling kulay ba ng cartolina ang ginamit nila? May mga libro ba akong nakalimutang bilhin? Madalas ba akong managinip nang gising at mag-agam-agam? Bakit walang nakaisip na gumising sa akin?