02 October 2026

Strangers

Dumating ako noong unang araw kasabay ang aking kapatid. Nang makita niya ang kumpol ng kaniyang mga kaibigan ay agad niya akong itinaboy at sinabihang makihalubilo sa aking batchmates. Kung sa bagay, baka hindi ko rin naman maintindihan ang kanilang mga magiging usapan. At noong freshie siya, hindi ko rin sigurado kung kinailangan niya ring makipag-usap sa wakas sa isa sa mga batchmate niya nang hindi magtuloy-tuloy ang panic.

Hindi rin naman ako nahirapan na hanapin ang mga katulad kong baguhan at totoong hindi alam kung ano dapat ang unang gawin. Katulad ng marami, nakiusyoso ako sa kumpol naman ng mga aligagang mag-aaral na pilit na may kinokopya sa isang blackboard na mayroong nakapaskil sa may harap ng Main Building. Napansin kong mga kaedaran ko sila at schedule ng mga klase ang kinokopya nila. Nakalagay rin ang lahat ng mga pangalan namin, section, at room assignments.

O baka guniguni ko na lamang ang lahat ng ito. Ang sigurado lamang ako bago matapos ang araw ng pangunang pangangapa at pagpapapansin, kapalarang isinadlak ako at ang aking mga kaklase sa section ng Diligence na kinailangan ko pang itanong sa internet pag-uwi para malaman ang ibig sabihin.