Alam mo bang pagbibilang mula one hanggang ninety-nine na lang ang kaya kong alalahanin sa French class namin? Ang iba pa doon, kailangan ko pang siguraduhin sa internet kung wasto pa ba ang hula ko na lamang na mga bigkas paminsan-minsan.
Ano pa ba? Naaalala ko pa rin ang "I don't understand," dahil iyon na lang ang madalas kong reaksiyon kapag nagkaklase na kami. Mabuti na lang siguro at naabutan na namin na marunong nang magsalin ang internet ng mga payak na parirala at pangungusap mula French patungong English, kaya medyo naiibsan ang ilan sa mga suliranin ko hinggil sa mga assignment at kung ano pang mga sulatin.
Nakapasa ba talaga ako sa French? Sa pagkakatanda ko kasi, mas madalas na dismayado lang ang guro namin sa karamihan sa amin sa tuwing isinasauli niya sa amin ang mga long exam na kung hindi sobrang baba ang iskor, bagsak. Baka katulad ng mga nakalipas naming mga guro at subject, pinagawa na lang yata kami ng special something para pandagdag kuno sa grado. Maaari ring may tropa na nakikinig talaga sa mga turo ng guro namin maski papaano, at hinahayaan niya lamang magpakopya ng mga sagot sa tuwing may pagsusulit. O puwede ring combination ng both, hindi na rin talaga ako sure.