19 October 2026

Transit

Fucking shit. Siyempre, dumaan din kaming lahat sa pagsulat ng research paper. At dahil science high school kami, hindi lang basta-basta dapat ang maaari naming isumite. Medyo pampahinga nang maluwag iyong hindi namin kailangang magsolo at maaari kaming makigrupo hanggang sa apat (yata) na miyembro.

Dagdag pampakalma rin na hindi mga batugang katulad ko ang ilan sa aking mga kamiyembro, at mas mahuhusay silang lahat kaysa sa akin. Sa pagkakaalala ko, ako na lang yata ang ginawang designated (ginawang designated??) typist (in a sense na modern computer keyboard na ang ginagamit namin dito), although relatively, mabagal pa rin ako magpipindot sa keyboard kumpara sa mga kakilala kong tunay na matutulin.

Wala na rin akong magagawa, ngunit wala na rin akong ibang maiaambag. Kahit pa yata iyong ibang commute namin papunta sa iba't ibang research facility, library, ahensiya, ospital, estasyon ng tren, palengke, restaurant, bahay ng kaklase, tindahan, paaralan, sketchy na tindahan, malaking bahay ng kaklase, tambayan, tulugan, kainan, pahingahan, sulatan, asaran, biruan, kuwentuhan, hindi yata ako nakapag-ambag ng aking pamasahe. Gayon pa man, pahintulot ng tiyaga at tadhana, naigapang din namin ang walang-hiyang research paper na 'yan. Ano nga ba ang aming natutunan sa huli?