16 October 2026

Detour

Mayroon kaming kakaibang subject dati, noong ikatlong taon, na hindi ko na rin maalala kung para saan. Sa pagkakaalala ko, pumapasok naman kami sa klase, right on schedule naman madalas, hindi rin naman palaliban ang guro, at hindi rin naman ako bad trip sa kaniya. Wala nga lang akong maalalang araw na nagturo siya.

Baka mayroon naman, at madali ko na lamang itong maisisisi sa mahina kong memorya at madalas ko ring pagmumuni-muni habang nagkaklase. Mabait ang gurong iyon, palakaibigan. Pakiramdam ko nga, puwede ka magpalibre sa kaniya ng food trip kapag natiyempuhan mo siya minsan sa canteen, e. Minsan, nauso iyong pelikulang The Dark Knight, halos buong oras lang yata siya nakipagkuwentuhan sa mga kaklase kong ibang klase rin ang alam na delaying tactics, huwag lang matuloy kung ano man ang nagbabadyang dapat na maganap.

Mayroon ding isang araw na nag-organisa ang klase ng runway o catwalk ng iba't ibang diyos at diyosa. Hindi ko rin makita ang kaugnayan noon sa subject, pero ganito kalala ang nabanggit kong delaying tactics ng mahuhusay kong kaklase. Umingay ang buong setup na naghudyat na manghimasok na ang isang guro galing sa ibang silid. Natuklasan niya ang hindi kapani-paniwalang nagaganap sa klase ng kapuwa niya guro hanggang sa matulak na lamang ang lahat na bumalik sa karaniwang kayamutan.

No comments: