20 October 2026

Slippage

Sinubukan kong unawain dati kung paanong natanggap at nakapasok (nakalusot?) ang guro namin sa isang subject, pero sino nga ba naman ako para kuwestiyunin kung sino-sino ang puwedeng magturo at mag-aral sa paaralan namin, bilang din namang hanggang ngayon, maski ako, kinukuwestiyon ko rin kung paano akong nagtuloy-tuloy hanggang sa makatapos, hindi ba?

Kahit na ganoon, hindi ko pa rin gets. For sure, hindi lang ako ang malay na malay na pumapasok siya sa mga klase ng ibang sections sa ilalim ng ibang guro sa parehong subject. Siguro, at suspetsa rin ng marami (Kapag marami na ba kayong nagsuspetsa, tsismis pa rin ba 'yon?), mayroon siyang mga aralin na hindi niya alam (o maaaring hindi pa masyadong malinaw para sa kaniya para maituro) kaya kinailangan niya, somehow, ng mangilang lektura mula sa ibang guro.

O baka maaga lang siyang pumasok at gusto niya lang makitambay para sa aircon. Hindi ko rin sure. At least, pursigido siyang matutunan ang mga dapat naming matutunan mula sa kaniya. Walang problema. Maiintindihan ko naman 'yon, kung iyon man ang totoong sitwasyon. Ang hindi ko na lang siguro mapagbigyan minsan ay kung bakit niya inakalang pinakyu ko siya gamit ang aking ballpen noong minsang nagtaas ako ng kamay habang nagkaklase.

No comments: