26 October 2026

Repertoire

Carol Fest. Tagisan ng boses sa pag-awit. Maliban sa dula, sabayang pagbigkas (hindi namin naabutan), at field demo, isa rin ito sa mga pagkakataon para magsama-sama ang buong klase para magpasikat — este, magpakita ng gilas sa sabay-sabay na pagkanta ng mga awiting pang-Pasko, maski pa ang ibang mag-aaral ay hindi nagdiriwang ng ganitong mga okasyon nang dahil sa kanilang paniniwala.

Kahit pa siguro atheist, hindi palalampasin makipagkompetensiya laban sa ibang section, lalo pa't hindi namin kailangang gumamit ng kahit na anong natutunan namin sa kahit na anong subject para lang manalo. Alam mo 'yon, hindi kailangang mag-aral? Ang tanging iisipin lang at kakabisaduhin, iyong awitin na napili ng music teachers at isa pang awiting napili naman ng konduktor ng klase.

Bilang din namang likas sa maraming Pinoy ang hilig sa pagkanta, dagdag pa rito ang tsansang matalo ang ilan sa mga section nang hindi kailangang magbuklat ng science at math, aba'y inaasahang magkakaroon ng pakialam ang halos buong klase. Huwag lang makonyatan ng kamalasan at bigla na lamang puntiryahin ng ilang judges dahil lang sa medyo nahuling submission ng music sheets na susuriin para sa paligsahan.

No comments: