Marami kaming naidaos na klase sa Bordner. Mangilang mga palapag ng pinaglumaang kahoy at alikabok, kalawang, occasional horror stories kapag science o math camps, mga naglalaplapang magjojowa, at lagusan patungo sa retail, garden na malamok, at lovers' lane.
Bagong-bago kaming mga mag-aaral at sa amin pinagamit araw-araw ang pinakalumang gusali ng paaralan. Hindi naman kami nagreklamo, wala naman ding mali. Nararapat lamang din siguro na ipagamit sa unang taon ang isa sa mga pinakaunang silid ng eskuwelahan.
Sa gusaling ito una kong inisip ang gagawin kong baduy na email address para sa isang subject pag-uwi ko sa bahay, unang beses akong nagkabisa ng blangkong mapa ng Pilipinas, unang danas kong manakawan ng pitaka na hanggang ngayon ay hindi ko pa rin alam kung sino ang salarin, unang pagkakataon kong pineke ang pirma ng magulang ko para sa isang bagsak na test, unang may kahingian ang isang guro na magdala dapat kami ng pamaypay dahil sa sobrang init ng mga silid, unang nakapaglaro ng Magic (Charge sa ibang section) habang nakapabilog at naghihintay ng guro na sana umabsent na lang, unang nakatikim ng pambubully ng isang higher year, unang nasigawan ng isang guro sa hallway, unang nagsigawan ang karamihan kasi kanselado ang mga klase, at unang nagbuntonghininga kung tama pa nga ba ang aking ginagawa.
No comments:
Post a Comment