09 October 2026

Indigo

Sa ikalawang taon kami nakatsamba ng gurong medyo moody, kung hindi niya sana mamasamain. Tipong unang linggo pa lamang ng mga klase at kailangang makapili kami ng kulay para sa aming notebook, nagkandaloko-loko na yata at nagkandagulo-gulo hanggang sa ang guro na lamang ang nagdesisyon ng kulay ng aming section. Nauwi kaming lahat sa rainbow na cover ng kuwaderno (kumpletong pito) dahil lang sa nakakairitang pagkukulang at wala na sa hinahong pamamahala.

O baka inimbento lang ulit ng utak ko iyon at may kupal lang na kaklaseng sumigaw ng rainbow at madalian siyang pinagbigyan ng aming guro. Malay ko at malay mo, madali lang talaga siyang dapuan ng bad trip kaya madali lang talaga ring madamay ang buong klase. Tulad din ng isang beses naman na may mangilang bumubungisngis habang naglelektura siya tungkol sa isang maselang aralin. Kagyat niyang hininto ang kaniyang pagpapaliwanag at simpleng hindi na natuloy ang aming pagkatuto.

Paminsan-minsan, dumadaplis-daplis pa rin sa aking diwa kung ano kaya ang hindi namin natutunan sa araw na iyon nang dahil lamang sa problemang nalunasan pa sana ng ibang solusyon. Mayroon ding madalang na pagtiyempo kung paano rin ako nakahanap (o nakahanap nga ba ako) ng art paper na indigo.

No comments: